48 اؤلچولو قادین پالتاری
گئییملر گؤرنده آنا، هر دؤنه
48 اؤلچوده قالار گؤزلريم.
جيبيم پوللاريمين قبرينه دؤنر،
تيترهيير ديزلريم، دولار گؤزلريم.
48 اؤلچوده پالتار گئيردين،
كسر شاختا مني، دؤير قار مني.
48 اؤلچويه چئوريليب دردين
ويتريندن بويلانيب يانديرار مني.
ایمكانيم هر دفعه ایمكانسيزلاشار،
باخار 48 ـ لر آرخامجا دست ـ دس.
هاميسي اَينينه گؤزل ياراشار،
نييه بيرينيده آلانميرام بس؟
قاليب گؤزلريمده مورازيم منيم،
تسلّيم بير شيرين گومانا قاليب.
سئوينمك قیسمتيم قيزيم زؤهرهنين
اؤلچوسو 48 اولانا قاليب.
دوشر بوي ـ بوخونون ياديما هرگون
بويون گئدر ـ گلمز يولچوسو اولوب.
گؤر نئچه ايلديركي، اَيين ـ باش اؤلچون
دؤنوب حسرتيمين اؤلچوسو اولوب.
ياز باشي قار ياغار ايلك نوباريما،
من سني ياز باشي ايتيرديم آنا!
اَيين ـ باشين اوچون ييغديقلاريملا
سني سون منزله اؤتوردوم، آنا!
او واختدان پاييم نه، تؤحفهلريم نه؟
اوغول يوخ، اورهيي داش اولموشام من!
پالتار عوضينه، سنين اَينينه
48 اؤلچوده داش آلميشام من!
48 اؤلچوده گؤرسم هر نهيي،
نبضيم قیرخ سکگیزه ائنر آن به آن.
اوچونوب يئريندن قوپار اورهييم.
سورونر موقدّس تورپاغيناجان.
48 اؤلچولو قادين پالتاري
توستومو تپهمدن قالخيزار گؤيه.
گلرم، اوستونده بيتن اوتلاري
گؤزومون ياشيلا اميزديرمهيه.
گئييملر ـ كئجيملر گلمز عينينه،
بيگانه قالميسان، آنا هر شئيه.
وطن تورپاغيني گئييب اَينينه
چوخدان قوووشموسان اؤلچوسؤزلويه
گئييملر گؤرنده آنا، هر دؤنه
48 اؤلچوده قالار گؤزلريم.
جيبيم پوللاريمين قبرينه دؤنر،
تيترير ديزلريم، دولار گؤزلريم.
"شاهمار اکبرزاده"
